Kosova, e treta në botë për numrin më të lartë të të infektuarve për 1 mln banorë

Në matjet e fundit, Kosova po regjistron një rritje drastike të numrit të të infektuarve me koronavirus. Shifrat reflektohen edhe në statistikat e Our World in Data, në të cilat vendi fqinj radhitet i treti në botë për numrin e të infektuarve për një milion banorë, përcjell albinfo.ch.

Referuar të dhënave që janë pasqyruar më 1 shtator, Kosova numëron 980 raste pozitive për një milion banorë. Kosova pasohet nga Gjeorgjia (976) dhe Mali i Zi (909). Ndërsa, vendin e parë si shteti më i prekur nga koronavirusi e mban Izraeli, edhe pse është një nga vendet me ritmet më të larta të vaksinimit në botë.

Në 24 orët e fundit Kosova ka regjistruar 1,612 raste me koronavirus nga 13,953 testime të kryera. Po ashtu, si pasojë e sëmundjes e humbën jetën edhe 32 qytetarë.