Shqipëria heq tatimin në pagat deri në 40 mijë lekë

Kryeministri i Shqipërisë, Edi Rama ka njoftuar se nga data 1 korrik e vitit që vjen, tatimi mbi të ardhurat për pagat deri në 40 mijë lekë do të jetë zero.

“Nga 1 korriku zero taksë mbi pagat deri në 40 mijë lekë”, deklaroi Rama, përcjell Albinfo.com

Ky vendim vjen pas ndryshimeve në ligjin për tatimin mbi të ardhurat, i cili garanton se qytetarët me më pak të ardhura të paguajnë tatim më të ulët mbi të ardhurat nga paga.

Në mënyrë që të lehtësohet barra tatimore e shtresave më në nevojë të popullsisë, është propozuar që tatimpaguesit me të ardhura personale nga punësimi në intervalin nga 30,001 lekë/muaj deri në 40,000 lekë/muaj tashmë të paguajnë 0 % tatim, nga 13 % tatim që paguanin mbi shumën 30,000 lekë/muaj.

Numri i tatimpaguesve që përfitojnë nga ulja e barrës tatimore është rreth 71,500 dhe shuma e përfitimit është mesatarisht 7800 lekë për tatimpagues/vit, ose rreth 557 milionë lekë/vit për të gjithë tatimpaguesit.

Tatimi 23 % parashikohet të fillojë të aplikohet në pagat mbi 200,000 lekë/muaj, nga 150,000 lekë/muaj që është aktualisht.