Italia gjobit Amazon me 1.13 miliardë euro

Autoriteti i Konkurrencës i Italisë gjobiti kompaninë Amazon me 1.13 miliardë euro për abuzim me pozitën e saj dominuese në treg dhe dëmtim të konkurrentëve në shërbimin logjistik të tregtisë elektronike.

Autorità Garante della Concorrenza e del Mercato (AGCM) tha të enjten se Amazon u jep shitësve duke përdorur shërbimin e saj logjistik, të quajtur “Përmbushja nga Amazon”, avantazhe për sa i përket dukshmërisë dhe shitjeve, duke përfshirë aksesin në etiketën e saj “Prime”. Amazon tha se nuk pajtohet me vendimin e AGCM dhe do të apelojë.

Gjoba e madhe vjen mes rritjes së shqyrtimit antitrust të Big Tech në mbarë botën. Komisioni Evropian ka hapur një hetim të ngjashëm me atë italian që fokusohet në pjesën tjetër të BE-së.

“Amazon mban një pozicion dominimi absolut në tregun italian për shërbimet e ndërmjetësimit në tregje, gjë që e ka lejuar atë të favorizojë shërbimin e vet logjistik”, tha Rregullatori italian në një deklaratë, duke shtuar se sjellja e Amazon ishte “veçanërisht serioze”.

AGCM vendosi gjithashtu masa të sjelljes, duke përfshirë urdhërimin e Amazon për të vendosur “standarde të drejta dhe jodiskriminuese” për shitësit e palëve të treta për të marrë avantazhe për sa u përket shitjeve dhe dukshmërisë. Një administrues i besuar monitorues do t’i shqyrtojë këto masa.

Mbikëqyrësi nisi hetimin e tij më 2019 mbi shqetësimet se Amazon po u jepte shitësve duke përdorur shërbimin e saj logjistik një shans më të mirë për t’u shfaqur si zgjedhja e Amazon për përdoruesit që kërkojnë një produkt të paraqitur në një seksion të veçantë të faqes së tij të internetit, “kutia e blerjes”. Kjo është një dritare kërcyese që u tregon klientëve produkte shtesë kur ata vazhdojnë me një blerje.

Duke thënë se kompania planifikon të apelojë vendimin e rregullatorit, një zëdhënës i Amazon tha: “Gjoba dhe mjetet juridike të propozuara janë të pajustifikuara dhe joproporcionale”.

Vitin e kaluar, Komisioni Evropian hapi gjithashtu një hetim për të njëjtat praktika, por e nxori Italinë jashtë fushëveprimit të hetimit, për të lejuar mbikëqyrjen antitrust të vendit që të vazhdojë. Në janar të këtij viti, Amazon e sfidoi këtë ndryshim.

Ashtu si autoriteti italian, Brukseli po heton praktikat e mundshme antikonkurruese që lidhen me Amazon që dyshohet se i shtyn shitësit të përdorin logjistikën dhe operacionet e shpërndarjes së kompanisë, duke përfshirë shërbimin e saj Prime. Hetimi fokusohet në mënyrën se si zgjidhen shitësit e palëve të treta për t’u përfshirë në “kutinë e blerjes”, duke përfshirë një vështrim të thellë të kritereve që Amazon përdor në përzgjedhje.

BE gjithashtu ka një tjetër hetim që fokusohet në gjigantin e tregtisë elektronike. Komisioni e ka akuzuar kompaninë për keqpërdorim të të dhënave të tregtarëve të pavarur që shesin në tregun e Amazon për të favorizuar produktet e vetë Amazon.

Në fund të nëntorit, autoriteti italian gjobiti Amazon dhe Apple në një rast të veçantë për marrëveshje për shitjen e produkteve të Apple-s

.