Problemet e Italisë me COVID-in, të shkaktuara kryesisht nga të pavaksinuarit

EPA/ETIENNE LAURENT

Numri i vogël i italianëve që refuzojnë të vaksinohen kundër COVID-19 janë kryesisht përgjegjës për krizën e vazhdueshme shëndetësore, tha të hënën kryeministri Mario Draghi, përcjell albinfo.ch.

Qeveria javën e kaluar i bëri të detyrueshme vaksinimet për të gjithë mbi 50 vjeç, një nga vendet shumë të pakta evropiane që ndërmori një hap të tillë, në një përpjekje për të lehtësuar presionin mbi spitalet e saj, ndërsa rastet e reja rriten.

“Nuk duhet të harrojmë kurrë faktin se shumica e problemeve që kemi sot janë për shkak se ka njerëz të pavaksinuar”, tha Draghi në një konferencë shtypi.

“Për të njëqindtën herë ftoj të gjithë ata italianë që ende nuk janë vaksinuar, ta bëjnë këtë dhe të marrin vaksinën e tretë”.

Ministri i Shëndetësisë, Roberto Speranza, tha se 89.4% e të gjithë atyre të moshës 12 vjeç e lart kishin marrë të paktën një dozë vaksine, por të pavaksinuarit përbënin dy të tretat e të gjithë pacientëve me COVID në njësitë e kujdesit intensiv, përcjell tutje albinfo.ch.