Sa presin mërgimtarët nëpër kufij

Kthimi nga vendlindja ka bërë që mërgimtarët të presin me orë të tëra për tu rikthyer në vendet ku jetojnë e punojnë

Një numër i madh i mërgimtarëve kaluan festat e fundvitit në Kosovë. Si gjithmonë ata gjatë kthimit janë përballur me pritje në kufi. Më gjatë kanë pritur në kufi me Hungarinë apo Kroacinë, shkruan albinfo.ch.

Në pyetjen nga albinfo.ch në Facebook se sa kanë pritur në kufi, disa lexues kanë ndarë përvojat e tyre.

“2 orë e 30 minuta Kosovë-Serbi, nëpër kufijtë tjerë 2-5 minuta deri në CH (Zvicër)”, është shprehur një lexues. “Përveç në kufi me Kroacinë pesë orë, në vendet tjera nuk kam pritur”, ka shtuar një tjetër lexues.

“13 orë Serbi-Hungari”, ka thënë një lexuese, duke marrë shumë reagime. “Prishtinë – Serbi – Kroaci -Slloveni – Austri – Gjermani = 46 orë rrugë”, ka shokuar një tjetër lexues i rregullt i albinfo.ch.

Por, kishte edhe më shumë. “56 orë. Nga e shtuna deri të hënën Kosovë – Hungari – Gjermani, megjithatë kur është në pyetja Kosova nuk llogaris”, ishte komenti i një lexuesi tjetër, ndërsa një tjetër shtoi shkurt “50 orë Kosovë-Slloveni”.

Kishte edhe komente që kishin pritur vetëm 2-3 orë apo ironizuese që kanë udhëtuar me aeroplan dhe nuk kanë pritur fare.

---