Kosova e Shqipëria, me lehtësira doganore mes vete

Marrëveshja parasheh njohjen e të gjitha licencave që ndodhen në pikat doganore, duke unifikuar kontrollet e vetëm një vendi dhe duke ulur kohën e kontrollit

Qeveria e Shqipërisë ka miratuar sot projektligjin e marrëveshjes ndërmjet Republikës së Shqipërisë dhe asaj të Kosovës për zbatimin e lehtësive doganore dhe kontrollit të hyrje-daljeve të mallrave.

Ministrja e Financave dhe Ekonomisë, Delina Ibrahimaj, bëri të ditur se marrëveshja e bashkëpunimit mes Qeverisë së Shqipërisë dhe asaj të Kosovës synon zbatimin e lehtësive reciproke të ndërsjella në procedurat doganore dhe kontrollit të hyrje-daljeve të mallrave, transmeton atsh, përcjell Albinfo.ch.

Sipas saj, kjo është një marrëveshje e nënshkruar në mbledhjen e përbashkët midis dy qeverive në nëntor të vitit të kaluar, ndërsa sot kjo marrëveshje shkon në Parlament me qëllim lehtësimin e tregtisë midis dy vendeve, duke njohur të gjitha licencat që ndodhen në pikat doganore, duke unifikuar kontrollet e vetëm një vendi, duke ulur kohën e kontrollit.

Ibrahimaj tha se “marrëveshja parashikon çeljen e pikës doganore të Kosovës në portin e Durrësit dhe lehtësitë që ajo do të sjellë.

Gjithashtu kjo marrëveshje njeh disa protokolle që do t’i hapin rrugë hapjes së pikave të tjera doganore të Kosovës në Republikën e Shqipërisë”.

---