Prodhuesit evropianë të bukës paralajmërojnë ngritje të lartë të çmimeve

Sipas tyre është e pashmangshme rritja e lartë e çmimit të bukës dhe produkteve të tjera ushqimore.

Koalicioni i 5 shoqatave më të mëdha europiane të prodhimit të bukës, përmes një letre dërguar Komisionit Europian ka ngritur shqetësimin për ndikimet e luftës në Ukrainë në rritjen e kostove të industrisë së bukës.

Sipas tyre, lufta në Ukrainë po shkakton stres të madh në zinxhirin e furnizimit të bukës që po përballet me rritje 60% të çmimit të grurit, 4-fishimin e çmimit të plehrave bujqësore dhe rritjen e larta që pësuar çmimi i energjisë, naftës dhe gazit, transmeton Albinfo.ch.

Koalicioni i shoqatave të prodhuesve të bukës në Europë paralajmërojnë se në këtë situatë të vështirë është e pashmangshme rritja e lartë e çmimit të bukës dhe produkteve të tjera ushqimore. Sipas tyre inflacioni i çmimeve do të zgjasë përtej 2022.

Prodhuesit europianë i kërkojnë Komisionit Europian marrjen e masave urgjente për të garantuar çmim më të ulët të energjisë për furrat, duke e konsideruar bukën ushqim bazë, uljen e barrierave tregtare në importet nga vendet e treta dhe masat mbështetëse lokale dhe ndihma shtetërore për operatorët (p.sh. TVSH, detyrime, të përkohshme ose të papunësisë).

 

---