Berset kundërshton kritikat për blerjen e miliona dozave të vaksinës

"Ne duam të jemi në gjendje t'i ofrojmë popullatës zvicerane vaksinat më të reja dhe më efektive në çdo kohë"

Deri më tani, në Zvicër janë injektuar 15.7 milionë doza vaksinash Covid 19. Tani, edhe 33 milionë doza të reja janë në dispozicion për vitin aktual. Sipas ministrit të Shëndetësisë Alain Berset, vendimi për të siguruar rezerva kaq të mëdha të vaksinave është marrë për të pasur më shumë siguri.

Ai ka mbrojtur sot para deputetëve të Dhomës Nacionale vendimin e Këshillit Federal për të rezervuar kaq shumë vaksina. “Siguria ka çmimin e saj”, ka thënë ai gjatë kohës së pyetjeve në parlament.

Udhëheqësi i grupit të qendrës, Philipp Matthias Bregy (VS) i kishte kërkuar atij një shpjegim për këtë vendim.

Këshilli Federal nuk dëshiron kurrë të ndodhet në një situatë ku duhet të vendosë masa drastike, është shprehur Berset. Vaksinimi është shumë i rëndësishëm në këtë drejtim.

“Ne duam të jemi në gjendje t’i ofrojmë popullatës zvicerane vaksinat më të reja dhe më efektive në çdo kohë”.

---