Përse po shtrenjtohen ushqimet në restorante në Austri?

dimitry-anikin-unsplash

Norma e inflacionit për qershorin 2022 pritet të jetë 8.7 për qind, ka llogaritur instituti i Statistikave të Austrisë si pjesë e një vlerësimi të shpejtë, transmeton albinfo.at

Krahasuar me muajin e kaluar, çmimet e konsumit u rritën me 1.4 për qind, tha Statistics Austria.

Ky është niveli më i lartë që nga viti 1975 ose pothuajse 50 vjet. Vala e inflacionit ka prekur më së shumti çmimet e energjisë dhe ushqimeve në Austri, por tashmë ka mbërritur edhe në sektorin e gastronomisë, me kosto në rritje në bare dhe restorante në vend.

“Inflacioni ka rritur shpejtësinë pothuajse në të gjitha fushat. Përveç rritjeve të fundit në çmimet e karburantit dhe naftës për ngrohje, ne shohim gjithashtu rritje të konsiderueshme në çmimet e restoranteve dhe ushqimeve”, sipas Drejtorit të Përgjithshëm të Statistikave të Austrisë, Tobias Thomas.

Fajtorët kryesorë të rritjes së çmimeve të ushqimeve në shitje me pakicë dhe restorante janë çmimet më të kushtueshme të energjisë dhe karburanteve. Ndërsa transporti dhe prodhimi bëhen më të shtrenjta, këto rriten edhe në gastronomi. Përveç kësaj, kostot e paketimit dhe logjistikës janë rritur gjithashtu, duke ndikuar drejtpërdrejt në çmimet e ushqimeve, tha Handelsverband, transmeton tutje albinfo.at