Zvicra, për shkak të neutralitetit të saj, nuk pranon të plagosur nga Ukraina

Refuzimi nga Berna vjen pavarësisht miratimit parimor që i është bërë planit të drejtorëve kantonalë të shëndetësisë, i cili parashihte pranimin e tyre

Zvicra nuk do të pranojë të plagosur nga Ukraina. EDA (Ministria e Jashtme e Zvicrës) e ka bërë të ditur këtë për agjencinë e lajmeve Keystone-SDA, të hënën. Gazetat Tamedia kishin raportuar më parë për negociatat përkatëse në këtë drejtim, transmeton albinfo.ch. Ndërsa arsyeja e anulimit që është dhënë nga departamenti i jashtëm ka të bëjë me “pengesat sipas ligjit të neutralitetit”.

Si një vend neutral – veçanërisht si një shtet depozitues i Konventave të Gjenevës – Zvicra, sipas EDA-s gjithashtu zotohet të sigurojë që, sipas ligjit ndërkombëtar të luftës, askush të mos kthehet në front pas rimëkëmbjes, shërimit, përcjell albinfo.ch. Në vend të kësaj, Zvicra dëshiron të intensifikojë përpjekjet e saj në terren.

Refuzimi nga Berna vjen pavarësisht miratimit parimor që i është bërë planit të drejtorëve kantonalë të shëndetësisë (GDK). Siç shkruajnë në një deklaratë të hënën, ata (drejtorët kantonalë) kanë ofruar trajtimin në Zvicër të personave të plagosur në Ukrainë.

---