Shqipëria e Italia, me marrëveshje për pensionet

Shqipëria e Italia kanë arritur marrëveshje teknike mes Italisë dhe Shqipërisë për njohjen e pensioneve.

Arritja e kësaj marrëveshjeje u cilësua si lajm i mirë nga kryetarja e Kuvendit, Lindita Nikolla.

“Lajm i mirë dhe i shumëpritur, Shqipëria dhe Italia konkluduan bisedimet teknike të marrëveshjes për sigurimet shoqërore. Kjo marrëveshje realizon njohjen reciproke të kontributeve e përfitimeve të pensioneve. 500 mijë shqiptarë dhe familjet e tyre pritet të përfitojnë pas nënshkrimit të marrëveshjes. Kuvendi ka mbështetur përpjekjet dhe bashkëpunimin e Qeverisë së Shqipërisë dhe Qeverisë së Italisë për zhvillimin e negociatave teknike dhe e ka mbajtur këtë çështje në prioritetet e bashkëpunimit me Dhomën e Deputetëve dhe Senatin e Italisë”, theksoi Nikolla, transmeton Albinfo.ch.

Nikolla u shpreh se “ratifikimi i marrëveshjes për pensionet, ndër prioritetet e sesionit të ri parlamentar”.

Kryetari i grupit parlamentar të Partisë Socialiste, Taulant Balla, e cilësoi lajm të mirë për shqiptarët marrëveshjen e arritur mes Italisë dhe Shqipërisë për njohjen e pensioneve.

Përmes një postimi në rrjetet sociale, Balla deklaron se nga marrëveshja për pensionet u vjen në ndihmë 500 mijë shqiptarëve që jetojnë e punojnë në Itali.

“Shqipëria dhe Italia sapo kanë përfunduar negocimin teknik të marrëveshjes për pensionet. Pas përfundimit të procesit teknik, do të ndiqen procedurat për ratifikimin e kësaj marrëveshjeje dhe, më në fund, pas një përpjekje të gjatë e thuajse të pamundur, rreth 500 mijë shqiptarë pritet të përfitojnë me hyrjen e saj në fuqi”, tha Balla.

 

---