Sëmundje vdekjeprurëse: shpërthen diftera në qendrën federale të azilit

Disa raste të difterisë kanë ndodhur në Qendrën Federale të Azilit në ish-Spitalin Ziegler në Bernë. Autoritetet kanë vënë në karantinë mbi 180 persona

Një sëmundje që prej kohësh është zhdukur në Zvicër po bën bujë në Qendrën Federale të Azilit në Bernë. Aty u diagnostikua difteria e faringut (fytit) tek dy persona. Sekretariati Shtetëror për Migracionin (SEM) konfirmoi për SRF News një raport përkatës nga portali i lajmeve Nau.ch.

Tek dy persona tashmë është shënuar një gjetje pozitive e toksinave dhe katër të tjerë janë ende në pritje, transmeton albinfo.ch. Simptomat respiratore nuk janë shfaqur në asnjë nga personat e prekur.

Për shkak të rasteve të difterisë, SEM ka vendosur karantinë në dy kate të ish-Spitalit Ziegler. Të prekur janë 92 azilkërkues të mitur të pashoqëruar në një kat dhe 83 azilkërkues në një kat tjetër. Të gjithë të infektuarit janë në izolim.

Banorët e tjerë janë në katet e tyre dhe janë në kontakt me njëri-tjetrin atje. Maskat janë të detyrueshme në të gjithë ndërtesën. “Ne i testojmë të gjithë në një shkallë të gjerë dhe sigurisht ofrojmë edhe vaksinime,” thotë zëdhënësi i SEM Samuel Wyss për SRF.

Personat që rezultuan pozitivë janë në izolim. “Nuk ka skepticizëm ndaj vaksinimit. Njerëzit janë të vetëdijshëm se difteria mund të jetë sëmundje serioze dhe vdekjeprurëse”.

Vdekshmëri e lartë

Difteria është një sëmundje infektive që sulmon organet si zemra dhe mëlçia, përcjell albinfo.ch. “Shkalla e vdekshmërisë për difterinë e faringut është e lartë (deri në 50 për qind), por mund të reduktohet në 5 deri në 10 për qind duke administruar menjëherë një antidot,” shkruan BAG në faqen e saj të internetit.

Në Zvicër, sëmundja praktikisht është zhdukur falë një vaksinimi. Hera e fundit që ka pasur një rast të difterisë së faringut ishte në vitin 1983.

---