Macron, i shqetësuar për centralin në Zaporizhia, bisedë telefonike me Putinin

Sipas zyrës së Macronit, presidenti rus ka rënë dakord të dërgonte në vend një mision ekspertësh nga Agjencia Ndërkombëtare e Energjisë Atomike (IAEA).

Presidenti francez, Emmanuel Macron, ia ka shprehur homologut rus shqetësimet për rreziqet e sigurisë në centralin bërthamor të Zaporizhias.

Komentet Macron i bëri gjatë një bisede telefonike me homologun e tij rus, Vladimir Putin. Sipas zyrës së Macronit, presidenti rus ka rënë dakord të dërgonte në vend një mision ekspertësh nga Agjencia Ndërkombëtare e Energjisë Atomike (IAEA), përcjell Albinfo.ch.

Në deklaratë thuhet gjithashtu se dy presidentët, të cilët diskutuan situatën në Ukrainë në një telefonatë më 19 gusht, ranë dakord të vazhdojnë bisedimet edhe ditët në vijim.

Centralin bërthamor të Zaporizhias e mori nën kontroll në mars Rusia, menjëherë pasi nisi pushtimin e paprovokuar të Ukrainës më 24 shkurt.

Centrali më i madh bërthamor në Evropë gjatë javëve të fundit ka shkaktuar frikë për një katastrofë bërthamore./Albinfo.ch

---