Kosovë: Krerët e shtetit diskutojnë situatën në veri, Kurti fton opozitën nesër në takim

Presidentja e Kosovës, Vjosa Osmani, ka pritur në takim kryeministrin e Kosovës, Albin Kurti, kryetarin e Kuvendit, Glauk Konjufca dhe ministren e Jashtme, Donika Gërvalla, me të cilët ka diskutuar për situatën e fundit në veri të vendit.

“Presidentja Vjosa Osmani ka mbajtur sot takimin e rregullt koordinues me kryetarin e Kuvendit, Glauk Konjufca, me kryeministrin Albin Kurti dhe me zëvendëskryeministren, Donika Gërvalla-Schwarz, lidhur me zhvillimet e fundit në veri të vendit. Gjatë takimit u theksua përkushtimi i institucioneve të Republikës së Kosovës për të garantuar mjedis të sigurt për të gjithë qytetarët e vendit përmes zbatimit të rendit dhe ligjit në koordinim të plotë me shtetet aleate dhe mekanizmat ndërkombëtarë të sigurisë në Kosovë”, thuhet në njoftim, transmeton albinfo.ch.

Ndërkohë kryeministri i Kosovës, Albin Kurti, u ka bërë ftesë liderëve të partive opozitare në vend për t’u takuar nesër në mëngjes.

Deri më tani, kësaj ftese i janë përgjigjur pozitivisht kryetari i Partisë Demokratike të Kosovës, Memli Krasniqi dhe ai i Aleancës për Ardhmërinë e Kosovës, Ramush Haradinaj.