Vazhdojnë arrestimet në “Call center” në Prishtinë

Shumë gjermanë po mashtrohen me thirrje “Call Center”, arrestohen 14 persona për mashtrime dhe shpëlarje parash

Dje, në një njoftim zyrtar, Prokuroria Speciale ka bërë të ditur se 14 persona janë arrestuar gjatë një aksioni në disa qendra të thirrjeve, të njohura si ‘Call Center’ në disa lagje të Prishtinës, përcjell albinfo.ch.

Thuhet se në mesin e 14 të arrestuarve janë edhe dy shtetas të huaj.

Ata po dyshohen për hyrje në sisteme kompjuterike, mashtrim dhe shpëlarje të parave.

Sipas njoftimit, thuhet se të dyshuarit kanë regjistruar si biznes “Qendër të thirrjeve” në Kosovë dhe përmes saj kanë komunikuar përmes telefonit me shtetas të ndryshëm, përfshirë edhe gjermanë.

“Gjatë komunikimeve kanë arritur t’i mashtrojnë të dëmtuarit, duke i shtyrë që të investojnë në platforma të ndryshme digjitale gjoja për investime. Për realizimin e mashtrimit të dyshuarit kanë përdorur edhe sistemin kompjuterik-përdorimi i softuerëve për qasje nga distanca si dhe krijimi dhe përdorimi i faqeve në internet”, thuhet në njoftim.

Me urdhër të Prokurorit të Shtetit, 14 personat e arrestuar dërgohen në mbajtje për 48 orë.

Po ashtu, në cilësi të provave gjatë këtij aksioni janë sekuestruar sende të ndryshme, të cilat do të përdoren në procedurë të mëtutjshme: 2 vetura, 167 kompjuterë, 3 laptopë, 21 telefona mobilë, 2 DVR, 2 HDD, 2 USB memorie, dokumente të ndryshme dhe prova të tjera elektronike relevante për rastin.

---