Si do të bëhet zëvendësimi i deputetëve serbë të dorëhequr

Lista Serbe në fillim të kësaj jave dorëzoi mandatet e deputetëve në Kuvendin e Kosovës. Dhjetë deputetë të këtij subjekti politik morën këtë vendim si shenjë proteste ndaj vendimeve të Qeverisë së Kosovës në raport me targat, përcjell albinfo.ch.

Kryeparlamentari Glauk Konjufca po të hënën procedoi kërkesën për zëvendësimin e tyre.

Tani dhjetë deputetët e dorëhequr do të zëvendësohen me dhjetë të tjerë të këtij subjekti politik.

Valdete Daka, ish-kryetare e KQZ-së, tha për Gazetën Online Reporteri.net se zëvendësimi do të shkojë sipas radhës në Listën Serbe, derisa ka kandidatë.

“Sa u përket deputetëve, procedura shkon sipas zëvendësimit. Pra, kërkesa tashmë është bërë. Edhe KQZ i zëvendëson sipas radhës, nga i njëjti subjekt politik, derisa ka kandidatë. Të njëjtit kandidatë ftohen nga Kuvendi i Republikës së Kosovës për ta dhënë betimin”, tha Daka.

Por, nëse do të ndodhë të kemi rastin, që të njëjtit nuk do të pranojnë, atëherë ish-kryetarja e KQZ-së thotë se do të vazhdohet me subjekte të tjera politike, po nga i njëjti etnitet.

“Nëse të njëjtit që shkojnë sipas radhës nuk pranojnë, atëherë vazhdojnë me tjera subjekte politike, nga i njëjti etnitet jo shumicë, të cilët kanë garuar për vendet e rezervuara në Kuvend”, tha Daka.

Por, kush janë kandidatët në radhë që do të mund të zëvendësojnë deputetët serbë në Kuvendin e Kosovës?

Në listën prej 20 kandidatësh të Listës Serbe, dhjetë prej tyre tashmë mund të jenë zëvendësues të atyre që u dorëhoqën.

Milan Kostiq, Zoran Maksimoviq, Svetislav Jokiq, Ksenija Bozoviq, Rados Mihajloviq, Biljana Maksiq, Milan Joksimoviq, Olivera Zdravkoviq, Nenad Redakonviq, Dragana Antonijeviq janë emrat e Listës Serbe që mund të gjejnë ulëse në Kuvendin e Republikës së Kosovës.