Doktori zviceran, në mesin e pesë astronautëve të rinj evropianë

33-vjeçari nga Berna u zgjodh nga gjithsej 22 mijë e 500 kandidatë që aplikuan për një vend në promovimin e fundit. 

Marco Sieber është zgjedhur si “astronaut karriere” nga Agjencia Evropiane e Hapësirës (ESA). Ai do të bëhet kozmonauti i dytë zviceran në histori.

33-vjeçari nga Berna u zgjodh nga gjithsej 22 mijë e 500 kandidatë që aplikuan për një vend në promovimin e fundit. Anëtarët e tjerë të ekuipazhit të elitës, të njoftuar nga ESA të mërkurën, vijnë nga Belgjika, Franca, Spanja dhe Mbretëria e Bashkuar, raporton Swi, përcjell Albinfo.ch.

Sieber, i cili aktualisht punon si urolog në qytetin dygjuhësh zviceran të Biel/Bienne, është gjithashtu një parashutist në ushtrinë zvicerane, si dhe mbajtës i licencës private të pilotit.

Ai më parë ka punuar si oficer kryesor mjekësor për forcat zvicerane në misionin paqeruajtës ndërkombëtar të KFOR-it në Kosovë.

Në kohën e tij të lirë, Sieber është një adhurues i sporteve aventureske, duke përfshirë hedhjen me parashutë, paragliding, scuba diving, turne me ski dhe kitesurfing.

Si astronaut karriere, ai do të trajnohet për misione për të udhëtuar në Stacionin Ndërkombëtar të Hapësirës (ISS) dhe më gjerë, tha ESA. 

Edukimi fillon me një kurs trajnimi bazë 12-mujor në Qendrën Evropiane të Astronautëve të ESA-s në Këln, Gjermani, në pranverë 2023./Albinfo.ch

---