Skandali me foshnjën e vdekur në lavatriçe, suspendohen 7 punonjës të spitalit të Pejës

7 punonjës të spitalit të Pejës janë suspenduar pas skandalit me foshnjën e vdekur që u gjet në lavatriçe

Lajmin e ka bërë të ditur ky institucion përmes rrjeteve sociale.

Një foshnje e cila ka vdekur javën e kaluar në spitalin e Pejës është futur me çarçafë në lavatriçe.

Rasti u konfirmua për Klankosova.tv edhe nga Prokuroria Themelore.

E lidhur me rastin janë suspenduar shtatë punonjës.

“Spitali i Përgjithshëm në Pejë me qëllimin që të bëjë hetime të papenguara dhe të detajuara për këtë rast deri më tani ka suspenduar 7 punonjës të Spitalit të Përgjithshëm në Pejë dhe është duke zhvilluar procedurat disiplinore me qëllim të zbardhjes së tërë rastit”, thuhet në njoftimin e spitalit. Më tutje bëhet e ditur se rasti është ende në hetim dhe sapo që organet e hetuesisë dhe Inspektoriatit shëndetësor të dalin me konstatime e veprime përfundimtare, opinioni do të njoftohet me detaje të ngjarjes dhe me masa adekuate të parapara me ligj, përcjell albinfo.ch.

“Në Repartin e Gjinekologjisë të Spitalit të Përgjithshëm në Pejë në mbrëmjen e datës 13.12.2022 tek një shtatëzëne e shtrirë në Spitalin tonë është bërë diagnostifikimi i frytit të vdekur nga ana e mjekut kujdestar, dhe si rrjedhojë ka ndodhur një intervenim kirurgjik dhe fetusi nxirret me prerje cezariane i vdekur në javën e 32 të gestacionit. Menjëherë me të ndodhur rasti organet e hetuesisë në njëren anë dhe paralelisht organet menaxheriale të Spitalit të Përgjithshëm në Pejë janë duke bërë hetime të detajuara lidhur me këtë rast. Duhet theksuar se hetimet nuk janë duke u bërë për ndërhyrjen kirurgjike apo përkujdesjen tjetër shëndetësore, por lidhur me mënyren se si është bërë ruajtja e fetuesit të vdekur, dhe tërë atë që ka ndodhur deri në dorëzim e Fetuesit të vdekur tek familjarët”, thuhet tutje në sqarim.