5 vjet burgim për kosovarin që me grua e fëmijë iu bashkua ISIS-it

Gjykata Themelore në Prishtinë e ka dënuar me gati pesë vjet burgim të akuzuarin H.S. për veprën penale “Organizimi dhe pjesëmarrja në grup terrorist”.
Departamenti Special i kësaj gjykate thotë se “i akuzuari H.S. është shpallur fajtor dhe është dënuar me dënim me burgim në kohëzgjatje prej 4 (katër) vjet e 8 (tetë) muaj, në të cilin dënim i llogaritet koha e kaluar në paraburgim nga data 01.08.2018 e tutje, por jo më shumë se dënimi i shqiptuar në aktgjykim”.

Të akuzuarit H.S., thotë gjykata, i është vazhduar paraburgimi deri në plotfuqishmërinë e aktgjykimit, por jo më shumë se dënimi i shqiptuar me burgim, njofton klan kosova, përcjell albinfo.ch.

“I akuzuari me datë 23.11.2015, me paramendim dhe me dashje si dhe me përgatitje paraprake së bashku me bashkëshorten e tij dhe vajzën e mitur kishte lëshuar territorin e Republikës së Kosovës, përmes Aeroportit Ndërkombëtar ‘Adem Jashari’ në Prishtinë dhe kishte udhëtuar për në qytetin e Stambollit të Republikës së Turqisë dhe përmes lidhjeve të caktuara kishte depërtuar në Siri, me qëllim që t’i bashkëngjitet organizatës terroriste ISIS, e cila në këto vende ka qenë duke u luftuar. Është angazhuar si pjesëtar i ISIS-it, si administrator në Byronë e ushtarëve të plagosur nën administrimin e ISIS-it, është financuar nga ISIS me shumën e të hollave prej nga 100 dollarë amerikanë në muaj, duke bashkëpunuar edhe me eprorë dhe luftëtarë të ISIS-it, si Lavdrim Muhaxheri, etj., e që më pastaj është dorëzuar tek Forcat Demokratike Siriane, ku edhe më 28.05.2022 është riatdhesuar në Republikën e Kosovës”, thekson Gjykata Themelore e Prishtinës, e cila ka njoftuar po ashtu se palët e pakënaqura kanë të drejtë ankese në Gjykatën e Apelit.