Kurti këtë javë për vizitë në Austri

Albin Kurti do të vizitojë Vjenën të enjten

Kryeministri i Kosovës, Albin Kurti do të vizitojë Vjenën të enjten, është bërë e ditur nga kryeqyteti austriak, përcjell albinfo.at.

Zyra e kancelarit federal austriak, Karl Nehammer, ka konfirmuar vizitën e kryeministrit të Republikës së Kosovës, Albin Kurti për këtë javë.

Kryeministri Kurti, do të mirëpritet nga Kancelari Federal, Karl Nehammer me nderime ushtarake. Pas një takimi të përbashkët pune, është planifikuar një konferencë për media.

Ndryshe Kryeministri i Kosovës, Albin Kurti, gjatë vizitës në Vjenë të enjten, do të mbajë edhe një fjalim i ftuar nga Instituti Austriak për Politikë Evropiane dhe të Sigurisë dhe Akademia Diplomatike e Vjenës. Ai do ta flas për “Kosovën, Ballkanin Perëndimor dhe Bashkimin Evropian’.

Ndryshe kjo vizitë e Kurtit në Austri vjen pas dorëzimit të aplikacionit për anëtarësim në BE dhe zhvillime pozitive rreth vendimit pozitiv për liberalizim të vizave nga ana e BE-së.

Kosova dhe Austria kanë bashkëpunim të mirë në shumë fusha.

---