Studim: Njerëzit që kanë kaluar COVID-in, më të rrezikuar nga sulmi në zemër dhe tru

Studimi i ri ka zbuluar se COVID-19 e rrit rrezikun e sulmit në zemër, por edhe atyre në tru.

Studiuesit amerikanë zbuluan se njerëzit e infektuar me virus kishin rrezik më të madh për t’u prekur nga këto sulme.

Sipas studimit, ata gjithashtu kanë më shumë gjasa të kenë edhe probleme të tjera të zemrës, duke përfshirë edhe rrahjet e çrregullta të zemrës.

Profesori Andrew Marks, nga Universiteti i Kolumbias në Nju-Jork, tha se mjekët duhet të jenë të vetëdijshëm për ndryshimet e zemrës që lidhen me infeksionet COVID-19, shkruan The Sun.

“Sa më shumë ndërgjegjësim të ndërtoni rreth aspekteve të veçanta të një sëmundjeje, aq më shumë ka të ngjarë të përmirësoni kujdesin ndaj pacientëve. Dhe mjekët duhet të jenë të vetëdijshëm për ndryshimet e zemrës që lidhen me infeksionet COVID-19 dhe duhet të jenë në kërkim të tyre. Ne duam të kuptojmë me të vërtetë se çfarë e shkakton sëmundjen e zemrës dhe si ta rregullojmë atë”, është shprehur ai.

Ekspertët kanë frikë se virusi mund të shkaktojë probleme me zemrën, duke u bazuar në studimet që tregojnë se ky virus mund të bëjë që sistemi imunitar i trupit të sulmojë qelizat e shëndetshme në muskuj.