Çdo vit nga 100 pjesëtarë largohen nga Policia e Kosovës, shkak pagat e ulëta

Rreth 100 pjesëtarë të Policisë së Kosovës llogaritet se japin dorëheqje vullnetare çdo vit. Ndërsa që nga themelimi i këtij institucioni, më shumë se 2200 policë të uniformuar e kanë lënë punën.

Këtë e ka bërë të ditur për Ekonomia Online kryetari i Sindikatës së Policisë së Kosovës, Imer Zeqiri.

Arsyet kryesore për braktisjen e PK-së janë pagat që nuk ofrojnë një jetë dinjitoze, mungesa e sigurimeve shëndetësore e jetësore, mungesa e kushteve, përcjell albinfo.ch.

Kryesindikalisti Zeqiri thotë se shqetësuese është rritja e këtij trendi vitet e fundit. Ai thekson se braktisja e punës nga zyrtarët është e dëmshme për vetë institucionin, por edhe për shtetin, pasi që është investuar shumë në ta.

“Dorëheqjet vullnetare janë shqetësim për Policinë e Kosovës, sepse janë në rritje. Gati për çdo vit kemi nga 100 ose mbi 100 dorëheqje vullnetare, e që nga themelimi i Policisë së Kosovës e deri më tani kemi mbi 2200 dorëheqje vullnetare të Policisë së Kosovës”, tha ai.