Librat shqip, tërheqin vëmendje në panairin e Leipzigut

Panairi i Librit Leipzig 2023 u rikthye për lexuesin pas tri vitesh mungesë, për shkak të pandemisë. Mijëra vizitorë kanë mbushur këto ditë hapësirën e panairit, ku pritet të mbahen takime të rëndësishme mbi librin. Shqipëria ka stendën e saj në këtë panair, një traditë tashmë falë bashkëpunimit me rrjetin Traduki dhe mbështetjen e Ministrisë së Kulturës së Shqipërisë, përcjell albinfo.ch.

Openbook ishte aktiviteti i parë i një cikli bisedash mbi librin, që do të mbahen përgjatë ditëve të Panairit nga Qendra Kombëtare e Librit dhe Leximit, i cili u mbajt ditën e parë të Panairit me autorët Loer Kume, Andreas Dushi, Flogerta Krypi dhe Ervin Nezha.

I konceptuar si një reflektim mbi atë çfarë Ballkani i hapur do të sjellë për librin, kulturën në rajon ky takim ngjalli interes tek lexuesit e pranishëm, thotë Alda Bardhyli, drejtore e QKLL. Në takim ishte i pranishëm dhe drejtori për librin në Ministrinë e Kulturës Serbe Mladen Vesković. E ardhmja përmes librit erdhi në diskutimet e autorëve të rinj shqiptarë që kërkojnë të cilët e shohin gjuhën si një mjet komunikimi që thyen barriera.

Gjatë aktivitetit u lexuan dhe pjesë nga krijimtaria e tyre në gjermanisht, nën përkthimin e Suzana Finger.

Aktiviteti u përshëndet dhe nga ambasadori i Shqipërisë në Gjermani, Artur Kuko. Stenda e Shqipërisë ka vijuar me në sërë aktivitetesh. Revolucioni i zemrave ishte një tjetër aktivitet i frymëzuar nga një qasje tjetër në rajon me shkrimtarët Lindita Arapi, Stefan Çapaliku, Ag Apolloni, drejtori i Bibliotekës Kombëtare të Kosovës Fazli Garaku dhe Ana Kove.

Qindra vizitorë kanë vizituar stendën e Shqipërisë, ku përgjatë gjithë kohës ka lexime nga letërsia shqipe.