Abdixhiku: Kurti po rrezikon shtetësinë e Republikës

Kjo s’është Kosova që e kishim menduar ndonjëherë

Kreu i LDK-së, Lumir Abdixhiku, thotë se lajmi për anulimin e mbeldhjes së përbashkët të dy qeverive është lajm i keq për shqiptarët, në Kosovë, në Shqipëri, në Luginë, Maqedoni e Mal të Zi, raporton GazetaBlic. Abdixhiku përmes një shkrimi në Facebook ka kritikuar kryeministrin Kurti, duke thënë se po rrezikon vetë shtetësinë e Republikës, përcjell albinfo.ch.

“Kjo s’është Kosova që e kishim menduar ndonjëherë”, shkruan Abdixhiku.“Rrugëtimi i Kurtit, përplasës me Perëndimin, rrezikon vetë shtetësinë e Republikës. Në vend se të sillet si një Kryeministër i përgjegjshëm, një që ruan partneritetet e avancon kauzat kombëtare drejt Perëndimit, ai sjell krizë dhe izolim. Aventura e tij politike nuk mund të jetë përfaqësimi ynë popullor”, shkruan tutje Abdixhiku.

Shkrimi i plotë:

Lajmi për anulimin e mbeldhjes së përbashkët të dy qeverive është lajm i keq për shqiptarët, në Kosovë, në Shqipëri, në Luginë, Maqedoni e Mal të Zi.

Kosova fatkeqësisht vazhdon të rrugëtoj drejt izolimit e vetmisë. Këtë herë, si asnjëherë, mbetëm dhe pa Shqipërinë. Po mbesim dhe do të mbesim pa secilin aleat që qëndronte me ne në çdo etapë të vështirë.Kjo s’është Kosova që e kishim menduar ndonjëherë.

Rrugëtimi i Kurtit, përplasës me perëndimin, rrezikon vet shtetësinë e Republikës. Në vend se të sillet si një Kryeministër i përgjegjshëm, një që ruan partneritetet e avancon kauzat kombëtare drejt perëndimit, ai sjellë krizë dhe izolim. Aventura e tij politike nuk mund të jetë përfaqësimi ynë popullor.

Kosovës i duhen miqtë. Kosovës i duhen partnerët strategjikë.

---