Shqipëria dënohet me 44 mijë euro nga UEFA

Federata Shqiptare e Futbollit, Facebook

Federata Shqiptare e Futbollit ka njoftuar që kombëtarja është dënuar me 44 mijë euro për hedhjen e fishekzjarrëve në fushë.

“Federata Shqiptare e Futbollit është njoftuar me vendimin e Komisionit të Etikës dhe Disiplinës në UEFA që ka vendosur të gjobisë FSHF-në me 44 mijë euro për hedhjen e fishekzjarreve në fushën e lojës, hedhjen e sendeve të forta, bllokimin e rrugëve të kalimit në sektorë të caktuar të stadiumit dhe mbylljen e pjesshme të stadiumit në tribunat veriore dhe jugore”, thuhet në njoftim, përcjell albinfo.ch.

Tutje bëhet e ditur që do të jetë në monitorim edhe për dy vjet të tjera, derisa do të ketë edhe mbyllje të tribunave.

“Mbyllja e këtyre tribunave është me kushtin që në ndeshjet e zhvilluara në shtëpi të mos ketë asnjë ndezje fishekzjarri në stadium. Vendimi për mbylljen e stadiumit është pezulluar për një periudhë prove, duke filluar nga ndeshja e radhës në shtëpi me Republikën Çeke. Mbyllja e stadiumit do të ishte e dëmshme për ekipin tonë kombëtar në këto momente, kur objektivi i synuar kërkon të ketë pranë dhe lojtarin e 12-të. Federata Shqiptare e Futbollit dëshiron t’u bëjë thirrje të gjithë tifozëve që mbështesin pa kushte Kombëtaren, të jenë korrekt me sjelljen e tyre në stadium, të mos përdorin mjete piroteknike, të cilat do të dënojnë skuadrën dhe tifozët në ndeshjet e ardhshme që janë vendimtare për fatin tonë drejt “Gjermani 2024””, thuhet tutje në njoftim, përcjell albinfo.ch.