Blinken, të hënën në Bruksel, temë diskutimi edhe Ballkani Perëndimor

Blinken

Sekretari amerikan i Shtetit, Antony Blinken, nga e hëna deri të mërkurën do të qëndrojë në Bruksel për të marrë pjesë në takimin e Ministrave të Jashtëm të NATO-s, teksa sipas njoftimit të Departamentit Amerikan të Shtetit, aty përfshihet edhe takimi i parë i ministrave të jashtëm të Këshillit NATO-Ukrainë, përcjell albinfo.ch.

Në njoftim bëhet e ditur se ndër temat e këtij udhëtimit të tij do të jetë edhe Ballkani Perëndimor.

“Sekretari i Shtetit, Antony J. Blinken, do të udhëtojë në Bruksel, Belgjikë, nga 27-29 nëntor 2023 për të marrë pjesë në Takimin e Ministrave të Jashtëm të NATO-s, duke përfshirë takimin e parë të ministrave të jashtëm të Këshillit NATO-Ukrainë. Sekretari Blinken do të theksojë angazhimin e palëkundur të NATO-s ndaj Ukrainës në luftën e saj kundër agresionit rus, do të theksojë mbështetjen tonë për demokracinë dhe stabilitetin rajonal në Ballkanin Perëndimor dhe do të diskutojë prioritetet për Samitin e Uashingtonit në korrik 2024”, thuhet në njoftim.