Tragjedia e një çifti në Kosovë, vdesin si pasojë e energjisë elektrike  

Burrë e grua kanë vdekur sot gjatë ditës në Bjeshkët e Junikut në Kosovë.

Lajmin e kanë konfirmuar nga Policia e Kosovës.

“Rreth orës 11:30 stacioni policor në Junik është njoftuar se në Bjeshkët e Junikut kanë vdekur burrë dhe grua. Në vend të ngjarjes kanë dalë komandanti dhe policët e stacionit në Junik. Vdekjen e ka konstatuar mjeku i Qendrës së Mjekësisë Familjare. Dyshohet se shkaktar ka qenë energjia elektrike”, njofton Policia.

Ndërsa Prokuroria njoftoi se janë duke i hetuar arsyet që quan në vdekjen e tyre.

“Janë dy trupa të pajetë që janë gjetur në një shtëpi banimi në Bjeshkët e Junikut. Prokurori i Krimeve të Rënda është duke shkuar në vendin e ngjarjes. Njësitet relevante policore do të bëjnë hetim rreth shkakut të vdekjes së tyre. Dy trupat e pajetë do të dërgohen për autopsi në Mjekësinë Ligjore”, deklaroi ai.

Mediat lokale kanë bërë me dije se bëhet fjalë për pronarin e një fabrike të ujit, M. Tofaj dhe bashkëshorten e tij.