A sinjalizojnë fundin e dimrit në Zvicër temperaturat e kësaj fundjave ?

Temperaturat e buta të fundjavës kanë nxitur dyshimet se ishin sinjalizim i përfundimit të dimrit në Zvicër.

Sipas parashikimeve të deritanishme, edhe kjo javë premton të jetë pranverë. Por, është ende e mundur që merkuri të bjerë në muajin shkurt, transmeton albinfo.ch.

Pas një fillimi të ftohtë të vitit, madje edhe me ngrirje vende-vende, prej disa ditësh edhe në lartësi, temperaturat i kalojnë 10 gradë.

Kjo është për shkak të kushteve anticiklonike. Zvicra është vetëm në gjysmën e ngrohtë të Evropës. Ashtu si Portugalia, Spanja dhe jugu i Francës, temperaturat janë më shumë si pranverë në disa rajone, shkruan SRF.

A ka mbaruar tashmë dimri? Është ende herët për të thënë, përgjigjet MétéoSuisse, teksa u tha se dëbora dhe ngrica janë plotësisht të mundshme javët në vijim.

Orteqe të mundshme

Ndërkohë, në Zvicër, temperaturat mesatare në janar janë aktualisht dy gradë mbi mesataren. Ky mot i butë nuk është pa pasoja.

“Kjo do të shkrijë borën. Kemi temperatura të larta në lartësi relativisht të larta. Kjo mund të krijojë orteqe, me sasi mjaft të konsiderueshme në vend”, ka thënë Isabelle Fath, parashikuese e MeteoSwiss, në La Matinale.

Kushtet e borës po përkeqësohen edhe në zonat e skijimit.

Temperatura sezonale në Gjenevë, La Chaux-de-Fonds dhe Sion mbetet për momentin më e lartë se mesatarja për periudhën 1991-2020. Një rritje e vazhdueshme mund ta renditë dimrin 2023-2024 ndër më të ngrohtët e regjistruar në Zvicër.