Ministrja për Arsim e Gjermanisë: Shkollat duhet t’i mësojnë nxënësit për një luftë të mundshme

Foto FB: Bettina Stark-Watzinger MdB

Ministrja e Arsimit në Gjermani, Bettina Stark-Watzinger, ka deklaruar se nxënësit në Gjermani duhet të jenë më të përgatitur për të përballuar të gjitha llojet e krizave dhe fatkeqësive të mundshme, përfshirë luftën.

“Shoqëria në tërësi duhet të jetë e përgatitur për krizat – nga pandemitë, përmes fatkeqësive natyrore, deri te lufta”, ka thënë anëtarja e FDP-së, transmeton albinfo.ch.

Në fjalën e saj, ajo ka marrë shembullin e Britanisë së Madhe, e cila kryen ushtrime të mbrojtjes civile në shkolla, duke thënë se edhe Gjermania mund të mësojë të bëjë të njëjtën gjë.

DW ka raportuar se ministrja gjithashtu ka bërë thirrje për zhvillimin e një marrëdhënieje “të qetë” midis nxënësve të shkollave dhe forcave të armatosura, teksa ka sugjeruar që zyrtarët ushtarakë të vizitojnë shkollat për të shpjeguar se çfarë “po bën Bundeswehr për sigurinë tonë”.