Ramadani kërkon fitoren ndaj Italisë

“Do të jetë e veçantë pasi luaj këtu në Itali. Ata janë një skuadër e fortë, por edhe ne do të luajmë për të fituar”, paralajmëroi Ramadani

Ylber Ramadani është kthyer në një element kyç të Lecces, e cila po bën shumë mirë në këtë sezon në Serinë A, edhe pse një prej skuadrave me buxhetin më të ulët. Mesfushori shqiptar është integruar mirë në lojën e skuadrës së tij, e cila arriti një rezultat të rëndësishëm teksa ndali në barazim pa gola Romën.

“Që pas 10 minutave të parë e ndjeja se mund të fitonim këtë ndeshje. Ata kishin vetëm dy raste të rrezikshme gjatë gjithë ndeshjes”, tha mesfushori për “DAZN”.

Ylber Ramadani tregoi edhe ndryshimet mes rolit të tij në kombëtaren e Shqipërisë dhe në klub, transmeton albinfo.ch.

“Në Kombëtare luaj bashkë me Bajramin dhe Asllanin, ndërsa me Blin kam më shumë mundësi të shtyhem para, kur marrim topin dua që të ec më përpara që të bëj gola”.

Ndeshja me Italinë në Evropian?

“Do të jetë e veçantë, pasi luaj këtu në Itali. Ata janë një skuadër e fortë, por edhe ne do të luajmë për të fituar”, paralajmëroi italianët Ramadani.

 

---