Klesta Krasniqi zgjedhet këshilltare komunale në Lausanne

Foto FB: Klesta Krasniqi

Shqiptarja Klesta Krasniqi është zgjedhur këshilltare komunale në Lausanne me grupin e partisë PLR.Les Libéraux-Radicaux Lausanne.

Lajmin e ka konfirmuar Krasniqi përmes një postimi në rrjetin social “Facebook”, ku ka thënë se do të angazhohet të përfaqësoj interesat dhe nevojat e komunitetit shqiptar në Lausanne.

“Ky është një moment i madh për mua dhe për të gjithë ne, pasi tregon që zëri ynë është dëgjuar dhe se jemi të përfaqësuar në vendimet më të rëndësishme të qytetit tonë. Si këshilltare komunale, angazhohem të ndihmoj dhe të përfaqësoj interesat dhe nevojat e komunitetit tonë shqiptar në Lausanne. Do të punoj me përkushtim për të promovuar dhe mbrojtur kulturën, gjuhën dhe identitetin tonë shqiptar në politikat vendore. Do të përpiqem të sjell ndryshime pozitive dhe të ndikoj në vendimmarrjen për të përmirësuar cilësinë e jetës së të gjithë anëtarëve të komunitetit tonë”, ka shkruar ajo, transmeton albinfo.ch.

Tutje, Krasniqi është shprehur e hapur për të marrë mendime në mënyrë që siç ka thënë ajo, ta bëjë punën e saj si këshilltare sa më efektive dhe të dobishme për shqiptarët në Lausanne.

“Jam e lumtur që mund të përfaqësoj komunitetin tonë shqiptar dhe do të bëj gjithçka për të përmbushur shpresat dhe pritshmëritë tuaja”, ka përfunduar Krasniqi.