Rezoluta e OKB-së, Kurti: Për paqe në Ballkan, duhet vërtetuar përgjegjësia e Serbisë

Albin Kurti, FB

Kryeministri i vendit, Albin Kurti, ka përgëzuar miratimin e Rezolutës së OKB-së për Gjenocidin në Srebrenicë, përcjell albinfo.ch.

Në llogarinë e tij në X, Kurti ka shkruar se gjenocidi në Srebrenicë shënon masakrën më brutale të Evropës që nga Lufta e Dytë Botërore.

“Për paqe në Ballkan, duhet vërtetuar përgjegjësia e Serbisë dhe nevojiten përpjekje të mëtejshme për të sjellë autorët para drejtësisë”, shkroi Kurti. Në Asamblenë e Përgjithshme të Kombeve të Bashkuara me 84 vota pro ka kaluar Rezoluta për Srebrenicën.

Në këtë votim morën pjesë 193 shtete, prej tyre 19 ishin kundër dhe 68 abstenuan, gjatë votimit vendet nuk patën të drejtën e vetos.

Me këtë rezolutë 11 korriku do të caktohet si si “Dita Ndërkombëtare e Reflektimit dhe Përkujtimit të Gjenocidit të vitit 1995 në Srebrenicë”.