Vashat kuqezi me sukses historik në futboll

Shqipëria e femrave ka shkruar historinë, me vajzat kuqezi që kanë arritur të kualifikohen për në fazën “Play Off” të Kampionatit Evropian të 2025-ës, që vitin e ardhshëm mbahet në Zvicër, shkruan albinfo.ch.

Në sfidën përballë Luksemburgut në “Elbasan Arena”, ishte Megi Doçi ajo që kaloi në avantazh Shqipërinë me anë të një 11-metërshi në minutën e 29-të, ndërsa në fundin e pjesës së parë dyfishoi shifrat Qëndresa Krasniqi.

Në fillimin e pjesës së dytë ishte Fortesa Berisha ajo që shënoi golin e tretë, ndërsa Luksemburgu shënoi vetëm një herë në minutat e fundit me Kremer, me rezultatin që shënoi 3-1.

Kështu Shqipëria e mbyll Grupin 5 të Ligës C me 9 pikë, duke siguruar kështu për herë të parë fazën “Play Off” të një Kampionati Evropian.