Rama: Po punohet për opsionet më të mira të hekurudhës Durrës-Prishtinë

Kryeministri i Shqipërisë, Edi Rama, gjatë qëndrimit në Kosovë ka folur për hekurudhën Durrës-Prishtinë. Rama ka thënë se po punohet për opsionet më të mira të hekurudhës.

Ai shtoi se hekurudha Durrës-Prishtinë i është nënshtruar një analize për opsione më të mira, transmeton Albinfo.ch.

“Është ky një projekt që e kemi bashkë në trajtim bashkërisht me Qeverinë e Kosovës, ne punojmë bashkë me Qeverinë e Kosovës, të tjerat pastaj janë në barcoleta për thashethemet mediatike. Në thelb ne punojmë bashkë edhe hekurudha Durrës-Prishtinë tani i është nënshtruar një analize për opsione më të mira, pastaj do të duhet të presim studimin e fizibilitetit dhe pastaj do të duhet të hyjmë në procesin e financimit”, theksoi ai.

Rama i bëri komentet në një konferencë për media, ku po ashtu u pyet edhe për mbledhjen e dy qeverive.

“Nuk ka plan për një mbledhje”, u përgjigj ai shkurt.

Ndërkaq, sa i përket grupit të unitetit për politikë të jashtme, Rama theksoi se duhet të ketë ndarje të interesit kombëtar nga ato partiake.

Rama është pritur në takim nga kryetari i Prishtinës, Përparim Rama, i cili ia ka dhuruar “Çelësi i Qytetit”./Albinfo.ch/