Lajçaku për draftin e Asociacionit: S’do të propozoja kurrë diçka që s’do ta bëja për vendin tim

Emisari i BE-së për dialogun Kosovë – Serbi, Miroslav Lajçak, duke folur për draftin e Asociacionit të komunave me shumicë serbe, ka thënë se kurrë nuk do të propozonte diçka, të cilën s’do t’ia propozonte as Sllovakisë. Në një intervistë për Sbunker-in në kuadër të Podcast “Kosovo Dispatch”, Lajçaku ka thënë se s’ka arsye për t’u frikësuar nga drafti evropian, përcjell albinfo.ch.

“Më pëlqen diskutimi i cili bazohet në fakte. Pra, është vërtet mirë të flasim për atë që është në dokument. Dhe ju e dini, disa vende të rëndësishme kërkuan nga Qeveria e Kosovës që ta dërgojë këtë draft për shqyrtim në Gjykatën Kushtetuese, që sigurisht është mënyra më e mirë për të parë se sa ky dokument i plotëson kërkesat kushtetuese”, ka thënë Lajçaku.

“Pra, ky është sigurisht, do të thosha, një propozim logjik për Qeverinë. Pra, nuk ka asnjë arsye për t’u frikësuar nga ky dokument, sepse siç thashë, ne do të bënim dhe unë personalisht nuk do të propozoja kurrë diçka që nuk do ta propozoja për vendin tim, ose që e di që nuk do të përmbushë standardet evropiane, vlerat evropiane dhe praktikat evropiane”, shtoi tutje sllovaku.

https://x.com/sbunker/status/1805524385949720595?ref_src=twsrc%5Etfw%7Ctwcamp%5Etweetembed%7Ctwterm%5E1805524385949720595%7Ctwgr%5E7fd2967a4078f48a9a73d10a42ddb7f046cc4d82%7Ctwcon%5Es1_&ref_url=https%3A%2F%2Fzeri.info%2Faktuale%2F541443%2Flajcaku-per-draftin-e-asociacionit-sdo-te-propozoja-kurre-dicka-qe-sdo-ta-beja-per-vendin-tim%2F

Në këtë intervistë për Sbunker-in, Lajçaku ka folur edhe për historikun e drafteve që janë bërë publike e që janë prezantuar në Bruksel. Sllovaku ka përmendur draftin e Ekipit Menaxhues, duke thënë se ai s’kishte qenë i pranueshëm as për palën kosovare e as për Bashkimin Evropian.

“Pra, ka pasur disa punime të prodhuara nga grupet e mendimit si Friedrich Ebert Stiftung, për shembull, por ka vetëm dy propozime të paraqitura zyrtarisht. I pari është teksti i propozuar nga i ashtuquajturi Ekipi Menaxhues. Kjo u prezantua në dialogun e 2 majit të vitit të kaluar. Por nga thelbi, nga përmbajtja, ky propozim nuk ishte i pranueshëm për Kosovën dhe në shumë aspekte nuk ishte i pranueshëm edhe për Bashkimin Evropian si lehtësues, sepse parimi ynë është që çfarëdo që të pajtohemi duhet të përmbushë standardet evropiane dhe praktikat më të mira evropiane”, ka sqaruar Lajçaku.