Kosova

Kurti e Vuçiq sot përballë njëri-tjetrit në Bruksel

Sot Kurti përballë Vuçiqit pas më shumë se 9 muajsh

E mërkurë, 26 Qershor 2024 - 9:50 albinfo.ch

Kryeministri i Kosovës, Albin Kurti, dhe presidenti i Serbisë, Aleksandar Vuçiq, pritet që sot në Bruksel të takohen për herë të parë që nga shtatori i vitit të shkuar. Zhvillimet që u paraprijnë takimeve dhe ato pasuese, mund t’i përcillni në këtë artikull.

BE-ja shpreson që Kurti e Vuçiq të hyjnë në takim me guxim politik.

Emisari i Bashkimit Evropian për dialogun Kosovë-Serbi, Miroslav Lajçak, ka thënë se shpreson që kryeministri i Kosovës, Albin Kurti, dhe presidenti i Serbisë, Aleksandar Vuçiq, të hyjnë në takimin e sotëm në Bruksel me vizion dhe guxim politik.

Po ashtu është bërë e ditur se para dhe pas takimit do të ketë deklaratë nga Përfaqësuesi i Lartë, Josep Borrell.

Për këtë raund të takimit javën e kaluar ishte për vizitë në Kosovë e Serbi, Miroslav Lajçak.

Ndryshe, kryeministri i Kosovës, Albin Kurti, tha të martën se takimi me presidentin serb do të jetë në funksion të rikapitulimit të procesit të dialogut.

Kurti: Do të shohim se si mund të ecim përpara

“Të shohim se në çfarë gjendje ndodhemi dhe cilat janë idetë se si mund të ecët para. Për bindjen time, Marrëveshja Bazike me Aneksin e Ohrit e bën normalizimin e raporteve mes Kosovës dhe Serbisë me njohje së paku de facto në qendër”, ka thënë Kurti, transmeton Telegrafi.

Tutje, Kurti u shpreh i bindur se marrëveshja bazike e 27 shkurtit të vitit të kaluar me aneksin e zbatimit nga Ohri “është zgjidhja evropiane e fqinjësisë së mirë, e cila nuk është realizuar”.

Për herë të fundit, Kurti dhe Vuçiq u takuan në Bruksel më 14 shtator të vitit 2023, kur diskutuan për zbatimin e Marrëveshjes në rrugën drejt normalizimit të raporteve, por ky takim rezultoi pa ndonjë përparim, për shkak të qëndrimeve kontradiktore të palëve.

Disa ditë më vonë, më 24 shtator 2023, një grup i serbëve të armatosur sulmuan policinë e Kosovës në fshatin Banjskë të Zveçanit – në veri të Kosovës – duke vrarë një polic. Gjatë përleshjeve që pasuan u vranë edhe tre sulmues serbë.