Rruga Thumanë-Kashar, pagesa do të jetë 2.1 euro

Ministria e Infrastrukturës dhe Energjisë në Shqipëri ka bërë të ditur se sistemi i pagesës për rrugën Thumanë-Kashar do të nisë zyrtarisht ditët në vazhdim, përcjell albinfo.ch.

Por, publiku do të njoftohet paraprakisht për datën dhe orarin e fillimit të pagesës.

“Deri në nisjen e këtij procesi, kompania do të kryejë në segmente të ndryshme kohore testime të kufizuara të sistemit të pagesës, për të kolauduar sistemin dhe aftësinë përpunuese të stafit. Lidhur me orarin e këtyre testimeve publiku do të njoftohet 24 orë më përpara”, thuhet në njoftimin e ministrisë.

Pagesa për kalimin në këtë aks do të jetë 2.1 euro, pa TVSH, ose ekuivalenca e saj në lekë, sipas kursit zyrtar të këmbimit të Bankës së Shqipërisë, në datën e fillimit të operimit të sistemit të pagesës.