Hamza pas takimeve në Uashington: SHBA qëndron pranë nesh

Bedri Hamza, kryetari i Mitrovicës të Jugut, njëherësh kandidat i propozuar për kryeministër nga Partia Demokratike e Kosovës për zgjedhjet e ardhshme, ka bërë të ditur se gjatë vizitës së tij në SHBA është takuar me asistentin Special të Presidentit Biden, ambasadorin Michael Carpenter, që njëherësh është Drejtor i Lartë për Evropë në Këshillin për Siguri Kombëtare (KSK), si dhe me Drejtoreshën për Ballkan dhe Evropë Qendrore (KSK), Kathleen Larkin.

“Mesazhi që mora ishte i qartë: SHBA qëndrojnë pranë nesh dhe mbështesin pavarësinë, sovranitetin dhe integritetin territorial të Kosovës”, ka shkruar Hamza në Facebook.

Hamza tha se u pajtuan që tani është koha për progres në konsolidimin e Kosovës drejt njohjes nga pesë shtetet anëtare të BE-së, të cilat ende nuk e kanë njohur pavarësinë e Kosovës, drejt sigurimit të udhërrëfyesit për anëtarësim të Kosovës në Partneritet për Paqe dhe përfundimisht në NATO e BE.

“Këto janë qëllimet strategjike për të cilat folëm gjerësisht. Për realizimin e të gjitha këtyre qëllimeve, partneriteti me SHBA-në është i rëndësisë jetike dhe për Kosovën, e për mua edhe i pazëvendësueshëm”, ka shkruar Hamza.

Ai tha se ka prezantuar shkurtimisht vizionin dhe planin e tij që Kosova të lëvizë më shpejt përpara drejt zhvillimit ekonomik, rritjes së pagave në sektorin publik, investimeve kapitale dhe rritjes së mirëqenies së qytetarëve.