Muriqi, ylli i mbrëmjes ndaj ‘Galaktikëve’

Vedat Muriqi shënoi ndaj Real Madridit, duke u shpallur Lojtari i Ndeshjes dhe mori vlerësime pozitive nga mediat spanjolle

Mallorca e Vedat Muriqit arriti të rrëmbejë një barazim të artë ndaj Real Madridit, në xhiron hapëse të edicionit 2024-25 në La Liga.

Golin e barazimit e shënoi Muriqi, i cili gjithashtu u shpall Lojtari i Ndeshjes.

“Ndihem tmerrësisht, shumë i lodhur, por ia vlente. Ishte shumë e rëndësishme të nisim kështu, me pikë. Ne e dimë se Real Madridi është një skuadër e madhe, se ata mund të jenë më të mirët në botë, dhe të fillojmë me një pikë, dhe aq më tepër kundër Madridit, është e mrekullueshme, e mrekullueshme për ne”, u shpreh sulmuesi nga Prizreni.

“Dhe akoma më i lumtur sepse pikën e shënoi pas golit të tij, që ka një kuptim të veçantë për të: “Duhet të jem i sinqertë, të shënosh një gol kundër Madridit është e mrekullueshme. E kam parë këtë në TV kur isha fëmijë, këtë ekip, këta lojtarë. Jam krenar për veten time, që kam shënuar një gol kundër Madridit, për ndarjen e fushës me këta yje botërorë, kështu që ne do të vazhdojmë të punojmë”, tha tutje ai.

Muriqi tha se është gjithmonë e vështirë të luash lojëra në La Liga, por ka disa skuadra që kërkojnë më shumë, siç është Real Madridi.

“Nuk mund ta imagjinoni. Sapo i thashë Militaos që ‘ju jeni të gjithë shumë të shpejtë”. Lojtarë shumë të mirë, yje botërorë. Nga sot e tutje u uroj atyre dhe neve fat në rrugën tonë”, përfundoi Muriqi.

Edhe mediat spanjolle e kanë lavdëruar sulmuesin e Kosovës. “Muriqi i vendos kufijtë Real Madridit”, ishte titulli i të përditshmes spanjolle “Marca” që vazhdoi më poshtë.

“Mallorca shkatërroi algoritmet që i dhanë Madridit trofeun e ligës para se të fillonte sezoni i ri. Përballë fantazisë së Rodrigos dhe BMV-së (Belingam, Mbape dhe Vini Jr), mjaftuan “çadrat” anësore dhe Muriqi për të vënë kampionin në vend të tij”, ka shkruar ndër të tjera “Marca”.

 

---