Kurti në Poloni për Forumin e Sigurisë

Keystone (AP Photo/Franc Zhurda)

Kryeministri i Kosovës ka udhëtuar për në Poloni për të marrë në Forumin e Varshavës për Siguri, ka njoftuar Zyra e Kryeministrit të martën.

Në njoftim u tha se me Kurtin është edhe ministri i Mbrojtjes, Ejup Maqedonci, derisa kryeministri do të mbajë fjalim me temën “Fokusohuni në Ballkanin Perëndimor: lidhja e gjeopolitikës dhe integrimit evropian”.

Tutje Zyra njoftoi se Kurti do të zhvillojë edhe takime edhe me pjesëtarë të mërgatës shqiptare në Poloni.

“Nga Shtetet e Bashkuara të Amerikës, Kryeministri i Republikës së Kosovës, Albin Kurti, ka udhëtuar për në Varshavë të Polonisë, ku së bashku me ministrin e Mbrojtjes, Ejup Maqedonci, do të marrë pjesë në Forumin e Varshavës për Sigurisë 2024 (WSF 2024). Në kuadër të Forumit, kryeministri Kurti sot do të mbajë një fjalim mbi temën “Fokusohuni në Ballkanin Perëndimor: lidhja e gjeopolitikës dhe integrimit evropian”. Gjatë qëndrimit në Varshavë dhe pjesëmarrjes në Forum, ai do të zhvillojë takime bilaterale, si dhe do të mirëpritet nga pjesëtarë të mërgatës sonë në Poloni”, thuhet në komunikatë.

Në anën tjetër, presidentja e Kosovës, Vjosa Osmani, ndodhet në Gjermani për t’u takuar me presidentin Frank Walter-Steinmeier.