Salzburg: Dënohen 7 të rinj për plagosjen me rrezik jete të kosovarit

Të pandehurit janë: dy serbë, një boshnjak, një turk, një slloven dhe dy austriakë me prejardhje migrimi

Procesi gjyqësor kundër një bande të rinjsh prej shtatë anëtarësh përfundoi të premten në Gjykatën e Landit të Salzburgut. Djemtë, të moshës 15 deri në 19 vjeç, akuzoheshin se kanë rrahur një kosovar 22-vjeçar në stacionin e trenit Bischofshofen më 23 qershor 2024.

Ai është rrëzuar përtokë dhe ka pësuar lëndime të rrezikshme për jetën, transmeton albinfo.at. Akuza ishte plagosje e rëndë me dashje me pasoja të qëndrueshme. Të pandehurit u dënuan me burgim nga një vit me kusht deri në tre vjet pjesërisht me kusht.

Viktima ishte tashmë i shtrirë në tokë pa ndjenja, por të rinjtë kanë vazhduar ta godasin me grushte 22-vjeçarin, tha prokurori në nisje të gjykimit të hënën.

Dy ditë në gjendje kome

Viktima ka pësuar një dëmtim të rëndë traumatik të trurit me gjakderdhje dhe një frakturë të hapur të bazës së kafkës, përcjell albinfo.ch. Kosovarit iu desh t’i nënshtrohej një operacioni urgjent, shkruan kurier.at. Ai ishte në koma të induktuar për dy ditë.

Të pandehurit, të cilët nuk kishin ndonjë precedent penal, që të gjithë jetojnë në Pongau, janë dy serbë, një boshnjak, një turk, një slloven dhe dy austriakë me prejardhje migrimi.

Tre të pandehur u deklaruan të pafajshëm. Të pandehurit e tjerë kanë pranuar se kanë shkaktuar lëndime normale trupore. Disa avokatë mbrojtës kritikuan se hetimi ishte i njëanshëm. Ata i cilësuan akuzat e prokurorisë si të tepruara.

 

---