Agjenda e seancës së përbashkët të Kuvendit të Kosovës dhe atij të Shqipërisë

Kuvendi i Kosovës dhe ai i Shqipërisë pritet që të premten të mbajnë seancë të përbashkët.

Kjo senacë është caktuar sot, në mbledhjen e Kryesisë së Kuvendit të Kosovës, teksa do të zhvillohet në sallën e seancave plenare të Kuvendit të Kosovës.

Sipas njoftimit, deputetëve pritet t’u adresohen edhe kryeministri i Kosovës Albin Kurti dhe ai i Shqipërisë, Edi Rama, transmeton albinfo.ch.

Shefja e Grupit Parlamentar të Lëvizjes Vetëvendosje, Mimoza Kusari-Lila, ka thënë se në agjendën e këtij takimi do të jetë adresimi i dy kryetarëve të kuvendeve, dy kryeministrave dhe shefave të grupeve parlamentare.

Kusari-Lila ka bërë të ditur se nga Kuvendi i Shqipërisë pritet të vinë rreth 60 deputetë, teksa u shpreh se në mbledhjen e Kryesisë është diskutuar edhe për mbajtjen e një seance për votim të marrëveshjeve ndërkombëtare.

Ajo ka deklaruar se si Grup Parlamentar e kanë konfirmimin e deputetëve “që kanë vendosur të mos kandidojnë që do të marrin pjesë në votimin e marrëveshjeve ndërkombëtare” dhe se për këtë seancë presin edhe konfirmimin e partive të tjera.