Cili është vendi më i përballueshëm në Evropë për të blerë shtëpi

Megjithatë, analiza nuk llogarit shpenzimet për ushqim, akomodim, përkujdesje për fëmijët apo detaje të tjera

Një raport i fundit peshon çmimet e pronave në Evropë dhe sa muaj pagash mesatare kushtojnë ato, duke nxjerrë në pah diferencat midis shteteve.

Njerëzit që jetojnë në Danimarkë kanë nevojë për kohën më të shkurtër për të blerë një shtëpi në Evropë, sipas BestBrokers.com. Raporti studioi çmimet e banesave, të ardhurat mesatare neto mujore, inflacionin dhe normat “reale” të interesit të hipotekave, të cilat janë normat e hipotekave të përshtatura me inflacionin, në 62 vende të botës. Megjithatë, analiza nuk llogarit shpenzimet për ushqim, akomodim, përkujdesje për fëmijët apo detaje të tjera, shkruan Scan, transmeton albinfo.ch.

Sipas të dhënave, çmimi mesatar i një prone prej 100 metrash katrorë është ekuivalenti i 114 pagave neto në Danimarkë, duke e renditur atë si vendin më të përballueshëm në Evropë për të blerë një shtëpi.

Për çdo gjë tjetër, Danimarka u rendit si shteti më i shtrenjtë në BE në vitin 2023. Çmimet për mallrat dhe shërbimet ishin 43% mbi mesataren e BE-së, sipas Eurostat, ndërsa të ardhurat mesatare vjetore ishin të shtatat më të larta në Evropë.

Sipas këtij raporti, Irlanda dhe Suedia renditen e dyta dhe e treta në listën e vendeve më të përballueshme në Evropë, me përkatësisht 123 dhe 129 paga neto, të mjaftueshme për të blerë një shtëpi prej 100 metrash katrorë. Kjo është e barabartë me afërsisht 10 vjet paga vjetore.

Në fundin e klasifikimit gjejmë Republikën Çeke dhe Sllovakinë. Në Sllovaki, shtëpia mesatare prej 100 metrash katrorë kushton 297 herë më shumë se paga mesatare dhe mund të blihej pas gati 25 viteve.

Vendi më i përballueshëm në botë për të blerë një shtëpi në krahasim me pagat është Afrika e Jugut, ku njerëzve u nevojiten 71 paga mesatare për të zotëruar një pronë prej 100 metrash katrorë. Shtetet e Bashkuara u renditën në vendin e dytë. Megjithatë, çmimet e pronave ndryshojnë shumë nga një shtet në tjetrin. Raporti zbuloi se, në SHBA, njerëzve u nevojiten 76 paga mesatare mujore për të blerë një shtëpi. Kjo është e barabartë me afërsisht gjashtë vjet paga vjetore.

Në fund të renditjes qëndron Nepali, me 684 paga të nevojshme për të blerë një shtëpi, i ndjekur nga Turqia me 631, ekuivalenti i fitimeve gjatë më shumë se 52 viteve.

---