Mbyllet një institucion paralel i Serbisë në veri

Foto: Arkiv, Mbyllja e nje objekti te strukturave paralele, Mitrovice e Veriut

Policia e Kosovës të premten ka bastisur edhe një objekt në Mitrovicë të Veriut, ku thuhet se janë zhvilluar aktivitete të Drejtorisë së Urbanizmit të Komunës.

Zëvendësdrejtori i Policisë për veri, Veton Elshani ka thënë se në këtë objekt kanë konfiskuar disa dokumente.

“Sot pas pranimit të informacioneve se në një banesë afërsi të shkollës teknike mund të ishte duke funksionuar një degë e urbanizimit të Mitrovicës Veri, kemi verifikuar këtë informatë dhe ka dalë të jetë e saktë. Pasi që është kontaktuar prokurori i rastit, janë konfiskuar dokumentet e gjetura aty, janë intervistuar disa persona dhe rasti si falsifikim i dokumenteve i bashkëngjitet rastit të mëhershëm që e kishim me Strukturën paralele të Mitrovica Veri”, ka theksuar Elshani.

Ai ka thënë se në këtë rast nuk ka persona të arrestuar.