Gjermani: Partitë arrijnë marrëveshjen historike për borxhin

(KEYSTONE/DPA/Kay Nietfeld)

Blloku konservator CDU/CSU dhe Social Demokratët (SPD) kanë rënë dakord në parim me të Gjelbërit për një reformë të borxhit që përfshin një rritje të madhe të huamarrjes shtetërore. Plani synon të përjashtojë shpenzimet e mbrojtjes nga kufiri i borxhit dhe të krijojë një fond special prej 500 miliardë eurosh për investime në infrastrukturë.

Një pjesë e kompromisit përfshin ndarjen e 100 miliardë eurove për klimën dhe transformimin ekonomik. Friedrich Merz e cilësoi këtë marrëveshje si një mesazh force për aleatët dhe kundërshtarët e Gjermanisë. Ai shtoi se pret një ndihmë ushtarake prej 3 miliardë eurosh për Ukrainën pas miratimit të reformës, shkruan DW.

“Ajo dërgon një mesazh të qartë për partnerët dhe miqtë tanë, por edhe për kundërshtarët tanë, për armiqtë e lirisë sonë: ne jemi të aftë të mbrohemi dhe tani jemi plotësisht të përgatitur për ta bërë këtë,” tha Merz.

Lars Klingbeil nga SPD e quajti këtë një nxitje të fuqishme për ekonominë gjermane.

“Ne kemi hedhur themelet që Gjermania të rimëkëmbet dhe të mbrohet,” tha ai.

Fillimisht, të Gjelbërit kundërshtuan planin, por u bindën për ta mbështetur atë për të siguruar shumicën e nevojshme në Bundestag.

Bundestagu aktual mund ta miratojë paketën të martën, përpara se ajo të kalojë në Bundesrat për miratimin përfundimtar, përcjell albinfo.