Kosova mirëpret njohjen nga Sudani

Kosova ka shënuar një tjetër moment të rëndësishëm në arenën ndërkombëtare, pas vendimit të Sudanit për të njohur pavarësinë e saj. Lajmi u mirëprit gjerësisht nga institucionet shtetërore dhe liderët politikë të vendit, të cilët e cilësuan këtë njohje si një hap të rëndësishëm drejt forcimit të subjektivitetit ndërkombëtar të Kosovës, shkruan albinfo.ch.

Kryeministri Albin Kurti reagoi menjëherë, duke e cilësuar njohjen si një miqësi të re për popullin dhe një fitore për shtetin. Ai falënderoi Presidentin e Sudanit për vendimin dhe shprehu mirënjohje ndaj Presidentes Vjosa Osmani, për angazhimin e saj në këtë proces.

“Shtetit tonë iu shtua edhe një njohje e re, e popullit tonë një miqësi më shumë. E mirëpresim njohjen nga Sudani, e cila vjen disa javë pas asaj nga Kenia. Shpresojmë që marrëdhëniet diplomatike të forcohen dhe të thellohen,” u shpreh Kurti.

Ministrja në detyrë e Punëve të Jashtme dhe Diasporës, Donika Gërvalla-Schwarz, tha se kjo njohje është dëshmi e përparimit të Kosovës në arenën ndërkombëtare dhe forcon pozitën e saj në kontinentin afrikan, transmeton albinfo.ch.

“Republika e Kosovës sot shënoi edhe një moment tjetër të rëndësishëm në rrugëtimin e saj ndërkombëtar. Presim me padurim ndërtimin e marrëdhënieve të qëndrueshme dhe bashkëpunimit konkret me Sudanin,” tha Gërvalla në një postim në rrjetet sociale.

Nga radhët e opozitës, njohja nga Sudani u vlerësua po ashtu si një sukses i rëndësishëm diplomatik. Deputetja e zgjedhur e PDK-së, Vlora Çitaku, theksoi se kjo është një arritje në procesin e konsolidimit ndërkombëtar të Kosovës, shkruan albinfo.ch.

“Ky është një lajm i mirë për të gjithë. Rritja e numrit të njohjeve është jetike për Kosovën në skenën globale,” tha Çitaku.

Edhe Ramush Haradinaj, kryetar i AAK-së, theksoi rëndësinë e njohjes, duke përgëzuar Presidencën për punën dhe kërkuar vazhdim të kësaj dinamike.

“Njohja nga Sudani është e mirëseardhur. Duhet të vazhdojmë me ritëm të shpejtë në këtë drejtim,” shkroi ai.

Lidhja Demokratike e Kosovës (LDK) e cilësoi aktin e njohjes si dëshmi të përkushtimit të shteteve paqedashëse ndaj vlerave të lirisë dhe paqes, transmeton albinfo.ch.

“Njohja nga Sudani përbën një moment të rëndësishëm për diplomacinë e Kosovës, duke dëshmuar besimin e ndërsjellë në parimet e paqes, stabilitetit dhe bashkëpunimit ndërkombëtar,” thuhet në komunikatën e LDK-së.

Ndërsa ish-ministri i Jashtëm, Behgjet Pacolli, tha se kjo njohje është pjesë e një vale të re mbështetjeje për Kosovën që u nis nga njohja e Kenisë.

“Njohja nga Sudani është lajm fantastik. Urime Kosovë! Përgëzime Presidentes Osmani për punën e saj të palodhshme në diplomacinë ndërkombëtare,” shkroi ai.

Kjo njohje shënon një hap të ri në përpjekjet e Kosovës për të thelluar praninë e saj diplomatike në kontinentin afrikan dhe në botë, duke e afruar më tej me qëllimin e anëtarësimit të plotë në organizatat ndërkombëtare, shkruan albinfo.ch.

 

---