Zgjedhjet për parlamentin e Vjenës: SPÖ fiton me rreth 40%, FPÖ trefishohet, ÖVP me rezultat katastrofal

Foto: Michael Ludwig - Facebook

Zgjedhjet e Vjenës kanë përfunduar dhe parashikimi i parë i trendit konfirmon kryesisht sondazhet paraprake: SPÖ mban vendin e parë me kryetar Michael Ludwig, por bie nën kufirin e 40 përqindëshit. Partia e Lirisë FPÖ e trefishoi voten e saj, me të Gjelbrit që renditen të tretët, të ndjekur nga NEOS  dhe ÖVP .

Rezultatet e para të zgjedhjeve parlamentare të Vjenës të mbajtura sot, janë si vijon:SPÖ: 39.04%, FPÖ: 20.4%, Të Gjelbrit: 14.6%, NEOS: 9.8%, ÖVP: 9.6%, KPÖ: 4.1%, Ekipi HC: 1.1%, shkruan krone.at përcjell albinfo.at.

Gazeta austriake bën me dije se rezultatet mund të ndryshojnë nga plus/minus tre përqind, kështu që renditja nga vendi i tretë e tutje nuk është e përcaktuar përfundimisht. Teorikisht, KPÖ ende mund të shpresojë të kalojë pragun prej pesë përqindëshit.

Pas rezultateve prelimenare, janë deklaruar edhe partitë politike:

SPÖ: “Trendi tregon se në kohë sfiduese, partitë në pushtet humbasin gjithmonë. 37 përqind është një rezultat i mirë zgjedhor; Michael Ludwig do të mbetet kryetar bashkie”, thotë sekretarja e partisë, Barbara Novak.

Të kënaqur me rezultatin, duket që janë edhe Partia e Lirisë: “Nëse ky trend vazhdon, do të ishte një sukses i madh për FPÖ-në”, tha sekretari i partisë FPÖ, Lukas Brucker.

ÖVP dhe të Gjelbrit kanë shprehur gatishmërinë e tyre për të qenë pjesë e qeverisë së Vjenës

Koalicioni aktual kuq-rozë nuk do të kishte më shumicë për sa i përket mandateve. Së bashku ata kanë 49 vende në parlamentin e Vjenës, ndërsa do të nevojiteshin 51, shkruan albinfo.at.