Austri: Rënie e ndërtimit të banesave

unsplash

Industria e ndërtimit në Austri po përjeton një rënie të ndjeshme, për shkak të pasigurisë ekonomike dhe faktorëve të tjerë të jashtëm, si inflacioni dhe normat e larta të interesit. Ndërtimi i banesave ka rënë ndjeshëm në të gjithë vendin, me një numër të vogël apartamentesh të reja që po ndërtohen në krahasim me vitet e kaluara, shkruan ORF dhe transmeton albinfo.ch.

Në Vorarlberg, për shembull, vitin e kaluar u ndërtuan vetëm 2 450 apartamente, një rënie e konsiderueshme krahasuar me 4 681 apartamentet e ndërtuara në vitin 2021. Kjo është një ulje e ndjeshme dhe numri më i vogël i apartamenteve të ndërtuara në këtë rajon në 15 vitet e fundit. Ky trend është evident edhe në pjesën tjetër të Austrisë. Sipas statistikave, ndërtimi i 31 200 apartamenteve të reja u miratua në vitin 2024, duke shënuar një rënie në krahasim me vitin rekord 2017, kur u miratuan 40 000 apartamente.

Rënia e kërkesës për pasuri të paluajtshme, pasiguria ekonomike dhe rregullat e rrepta për dhënien e kredive janë disa nga arsyet kryesore që kanë ndikuar në këtë situatë. Sidoqoftë, ka edhe një shpresë për industrinë e ndërtimit, pasi rregullorja KIM pritet të skadojë pas më shumë se dy muajsh, çka mund të lehtësojë procesin e marrjes së kredive për ndërtim dhe të stimulojë kërkesën për apartamente e shtëpi, transmeton albinfo.ch.