Gjermani: SPD do të votojë për marrëveshjen e koalicionit

Foto: Friedrich Merz, FB

Partia Social-Demokratike (SPD), e qendrës së majtë në Gjermani, ka afat deri sonte, në orën 23:59, për të përfunduar votimin për marrëveshjen e koalicionit me Bashkimin Kristian-Demokrat (CDU) dhe Bashkimin Kristian-Social (CSU). Votimi po zhvillohet mes anëtarësisë së gjerë të partisë, e cila numëron rreth 358,000 anëtarë. Për të qenë i vlefshëm, procesi duhet të arrijë një pjesëmarrje minimale prej 20%.

Marrëveshja e koalicionit, e cila përfshin 144 faqe, tashmë është miratuar nga CDU-ja të hënën dhe nga partnerja e saj bavareze, CSU-ja. Nëse votimi i SPD-së kalon me sukses, kjo do të hapë rrugën për formimin e qeverisë së re nën udhëheqjen e kancelarit të ardhshëm, Friedrich Merz.

Merz tashmë ka emëruar disa nga figurat kyçe që do të mbajnë postet ministrore: Johann Wadephul është caktuar ministër i Jashtëm, duke pasuar Annalena Baerbock të të Gjelbërve, ndërsa ekonomia e Gjermanisë do të kalojë në duart e Katherina Reiche, aktualisht drejtoreshë ekzekutive në Westenergie, degë e kompanisë gjigante të energjisë E.ON.

Alexander Dobrindt, nga CSU-ja, është nominuar për ministër të Brendshëm.

Rezultati i votimit të SPD-së pritet të bëhet i ditur të mërkurën dhe do të jetë vendimtar për konsolidimin e qeverisë së re të koalicionit në Gjermani, pas negociatave intensive politike që kanë zgjatur disa javë, transmeton albinfo.ch.