Zvicër: Çfarë organizimi pritet të bëj Eurovision për Céline Dion

Thashethemet për rikthimin e madh të Céline Dion në Eurovision po shtohen, teksa raportet e fundit sugjerojnë se ekipi i prodhimit të konkursit të këtij viti është në negociata të avancuara me yllin ndërkombëtar kanadez, përcjell albinfo.ch.

Referuar gazetës zvicerane Le Matin, emri i Céline Dion është përfshirë dy herë në skenarin e shfaqjeve live të Eurovision 2025. Konkretisht, në gjysmëfinalen e parë më 13 maj është planifikuar një nderim i veçantë për këngëtaren që i dha Zvicrës fitoren në vitin 1988. Ndërkohë, në finalen e madhe më 17 maj, raportohet se është planifikuar një shfaqje dy-minutëshe me pjesëmarrjen e saj.

Yves Schifferle, producenti i Eurovision 2025, konfirmoi për Euro Trip Podcast se “diskutimet me ekipin e Dion” janë në zhvillim e sipër, por asgjë nuk është finalizuar ende. Ai shtoi se kontaktet kanë nisur prej disa javësh dhe janë ende aktive.

Céline Dion fitoi Eurovisionin në vitin 1988 duke përfaqësuar Zvicrën me këngën ikonike “Ne Partez Pas Sans Moi”, një moment që mbetet një nga më të paharrueshmit në historinë e festivalit.

Zvicra është vendi mikpritës këtë vit pas fitores së Nemo në vitin 2024 me këngën “The Code”, që grumbulloi 591 pikë (365 nga juritë dhe 226 nga televotimi). Kjo ishte fitorja e dytë e Zvicrës në historinë e Eurovisionit, pas një pritjeje prej 37 vitesh.

Konkursi i 69-të i Këngës në Eurovision do të mbahet në Bazel, më 13, 15 dhe 17 maj 2025.